जहाज मार्केटिङ गर्न जर्मन कम्पनी काठमाडौमा

लक्ष्मीप्रसाद खतिवडा

काठमाडौँ, २० फागुन

युरोपको एउटा जहाज निर्माता कम्पनी जहाज मार्केटिङका लागि काठमाडाँ आएको छ । जर्मनीको ‘आरयुएजी’ कम्पनीका प्रतिनिधि मण्डल जहाजसहित मार्केटिङका लागि नेपाल आएका हुन् ।

कम्पनीद्वारा निर्मित डोर्नियर ‘डीओ २२८’ न्युजेनेरेसन जहाज व्यावसायिक प्रवद्र्धनका लागि हाल त्रिभुवन अन्तर्राष्ट्रिय विमानस्थल परिसरमा राखिएको छ । निजी वायुसेवा कम्पनी सीता एयरको सहयोगमा जहाज नेपाल ल्याइएको हो । सीता एयरका मार्केटिङ डाइरेक्टर सुनिल बिस्टले नेपाली भूगोल सुहाउने भएकाले कम्पनीको विशेष अनुरोधमा जहाज नेपाल ल्याइएको बताए ।

कम्पनीले यसअघि सिङ्गापुर, मलेसिया, थाइल्यान्ड तथा श्रीलंकामा जहाजको मार्केटिङ गरेको र कतिपय मुलुकले अर्डरसमेत गरिसकेको बिस्टले जानकारी दिए । कम्पनीले सीता एयरलाई नेपालका लागि एजेन्ट तोकेको छ ।

जहाज अवलोकनका लागि पर्यटन तथा नागरिक उड्डयनमन्त्री लोकेन्द्र बिस्ट तथा नेपाल नागरिक उड्डयन प्राधिकरणका उच्च अधिकारीहरू विमानस्थल पुगेका थिए । १९ सिट क्षमताको सो जहाजबारे मन्त्री र प्राधिकरण अधिकारीहरूले विस्तृत विवरण लिएका थिए । प्राधिकरणले विभिन्न विमानस्थलमा परीक्षण उडान गर्न, दैवी विपत्तिमा उद्धार गर्न तथा व्यापारिक प्रयोजनका लागि जहाज खरिद गर्ने प्रक्रिया अगाडि बढाइसकेको छ । मन्त्री बिस्ट प्राधिकरण सञ्चालक समिति अध्यक्ष हुन् ।

नेपाल एयरलाइन्स तथा नेपाली सेनाका उच्च अधिकारीहरूले समेत जहाज अवलोकन गरेको कम्पनीले जनाएको छ । त्यस्तै निजी वायुसेवा कम्पनीहरूले पनि जहाजमा चासो देखाएका छन् ।

हाल नेपालमा उडिरहेका डोर्नियर जहाजको तुलनामा यसमा आधुनिक प्रविधि जडान गरिएको कम्पनीले जनाएको छ  । यो जहाज पूर्णरूपमा ग्लास ककपिटसँगै ‘एफएमएस’ प्रविधिमा उडाउन सकिने सीता एयरका प्राविधिकले बताएका छन् । हाल सीताले डोर्नियर जहाजमात्र उडाइरहको छ ।

६ दशमलव पाँच मिलियन युरो अर्थात् करिब ६८ करोड २५ लाख नेरु. पर्ने जहाज इच्छुक ग्राहकलाई सहुलियत ऋणमार्फत किस्ताबन्दीमा समेत बेच्न सकिने कम्पनीले जानकारी दिएको छ । आरयुएजीका नेपाल तथा भारत हेर्ने निर्देशक अशोक मारबाहले ‘डेमो’का लागि जहाज नेपाल ल्याइएको हो भन्दै कुनै ‘पार्टी’ खरिदका लागि इच्छुक भए तत्कालै बेच्न सकिने बताए ।

गत साता काठमाडौँ ल्याइएको जहाज सोमबार जर्मनी फर्कँदै छ । कम्पनीकै पाइलटले जर्मनीबाट भारतहुँदै जहाज काठमाडौँ ल्याइपुयाएका हुन् । डेढ वर्षअघि पनि कम्पनीका अधिकारी जहाजको मार्केटिङका लागि नेपाल आएका थिए । तर त्यतिखेर जहाज ल्याइएको थिएन । पुरानो मोडलको तुलनामा नयाँ मोडलले राम्रो पर्फमेन्स दिने कम्पनीको दाबी छ । कम्पनीका अनुसार यो जहाजको पङ्खामा पाँच ‘ब्लड’ छन् जसले गर्दा आवाज कम हुन्छ, गति बढी हुन्छ, इन्धन कम खपत गर्छ र कम थर्किन्छ । सानो दूरीमा रोक्न र उडाउन सकिने भएकाले नेपालका ‘स्टल’ एयरपोर्टका लागिसमेत जहाज उपयुक्त हुने प्राविधिकको भनाइ छ ...

घट्यो चिनियाँ पर्यटकको आगमन

काठमाडौं, १८ फागुन 
लामो समयदेखि बढ्दो क्रममा रहँदै आएको चिनियाँ पर्यटकको आगमन वृद्धिदर सन् ०१२ को दास्रो महिना फेब्रुअरीमा घटेको छ । त्रिभुवन अन्तर्राष्ट्रिय विमानस्थल अध्यागमन कार्यालयको तथ्याङ्कअनुसार फेब्रुअरीमा चिनियाँ पर्यटक गत वर्षको सोही महिनाको तुलनामा २३.१ प्रतिशतले घटेको हो । गत वर्षको फेब्रुअरीमा चार हजार एक सय ९३ चिनियाँ पर्यटक हवाइमार्ग हुँदै नेपाल आएकोमा यो वर्षको फेब्रुअरीमा यो सङ्ख्या तीन हजार दुई सय २६ मा झरेको छ । सन् ०११ मा चिनियाँ पर्यटक ७७.६ प्रतिशतले बढेका थिए । गत वर्ष ४५ हजार चार सय चिनियाँ पर्यटक हवाइमार्ग हुँदै नेपाल आएको तथ्याङ्क छ । यो नेपाल आउने कुल पर्यटकको ८.३ प्रतिशत हिस्सा हो ।

यस वर्षको फेब्रुअरीमा सन् ०११ को सोही महिनाको तुलनामा १३.७ बढी विदेशी पर्यटक हवाइमार्गबाट नेपाल आएका छन् । गत वर्ष फेब्रुअरीमा ३७ हजार पाँच सय ८४ पर्यटक आएकामा यो वर्षको फेब्रुअरीमा यो सङ्ख्या ४२ हजार सात सय १६ पुगेको छ । फेब्रुअरीमा सबै क्षेत्रका पर्यटक आगमन वृद्धि सकारात्मक देखिएको छ ।

भारतबाट आउने पर्यटक २८.८ प्रतिशतले बढेका छन् । यो महिना भारतबाट ११ हजार ९३ पर्यटक हवाइमार्ग हुँदै नेपाल आएका छन् । भारतबाहेक अन्य दक्षिण एसियाली मुलुकहरू बङ्गलादेश, श्रीलंका र पाकिस्तानबाट आउने पर्यटक भने केही घटेका छन् । समग्रमा दक्षिण एसियाली पर्यटकको वृद्धिदर २०.४ प्रतिशत छ । यो महिना सार्क मुलुकबाट १२ हजार आठ सय ८३ पर्यटक नेपाल आएका छन् ।

दक्षिण एसियाबाहेक अन्य एसियाली मुलुकबाट आउने पर्यटक ४.३ प्रतिशतले बढेको तथ्याङ्कले देखाएको छ । एसियाली मुलुकबाट यो महिना १० हजार दुई सय तीन पर्यटक आएका छन् । गत वर्षको फेब्रुअरीमा यो सङ्ख्या नौ हजार सात सय ७९ थियो । एसियाली मुलुकहरू जापान, मलेसिया, दक्षिण कोरिया र थाइल्यान्डबाट आउने पर्यटक क्रमशः ३३.२, १९.८, ३१.५ र ७.९ प्रतिशतले बढेका छन् । तर चिनियाँ र सिंगापुरे पर्यटक भने यो महिना घटेका छन् ।

युरोपियन बजारतर्फ १७.५ प्रतिशतले पर्यटक बढेका छन। बढी खर्च गर्ने पर्यटक आउने मुलुकहरू बेलायत, फ्रान्स, जर्मनी, इटली, स्पेन, स्विडेन, स्विट्जरल्यान्ड तथा रसियाबाट आउने पर्यटक बढेका छन् । यद्यपि नेदरल्यान्ड र नर्वेबाट आउने पर्यटक भने केही घटेको तथ्याङ्कले देखाएको छ ।

अस्ट्रेलियाली र अमेरिकी पर्यटक क्रमशः १८.५ र १०.४ प्रतिशतले बढेका छन् । त्यस्तै क्यानाडा र न्युजिल्यान्डबाट आउने पर्यटक पनि बढेको तथ्याङ्कले देखाएको छ । यो वर्षको पहिलो दुई महिनामा कुल ८४ हजार सात सय ४७ विदेशी पर्यटक हवाइमार्ग हुँदै नेपाल आएको नेपाल पर्यटन बोर्डले जनाएको छ । यो सङ्ख्या गत वर्षको सोही अवधिको तुलनामा २०.२ प्रतिशतले बढी हो । सन् ०११ को जनवरी र फेब्रुअरीमा गरी ७० हजार चार सय ९८ पर्यटक आएका थिए । सन् २००९ को जुनदेखि नेपाल आउने विदेशी पर्यटकको सङ्ख्या बढ्दो क्रममा छ ...

पर्यटनमा ग्रहण

नेपाल प्राकृतिक रुपले विश्वमै सुन्दर मुलुकको सूचीमा पर्छ । यसलाई पर्यटकीय दृष्टिले सहज, सुगम र भयरहित देश भनेर चिनिन्थ्यो । माओवादीले सशस्त्र द्धन्द्धको थालनी गरेपछि पश्चिमाहरुले यस मुलुकलाई पर्यटकीय हिसाबले अति जोखिमपूर्ण देशको सूचीमा दर्ज गरे । शान्ति सम्झौतापछि त्यस अवस्थामा केही सुधार भएको थियो । तर, अहिले आएर फेरि पुरानो मित्रराष्ट्र बेलायतलगायत विभिन्न मुलुकले आफ्ना नागरिकलाई नेपाल भ्रमण गर्दा सचेत हुन आग्रह गरेका छन् । यो नेपाल राष्ट्रका लागि दुःखद् विषय हो ।

भर्खरै समाप्त भएको पर्यटन वर्ष २०११ र घोषणा गरिएको लुम्बिनी भ्रमण वर्षको सङघारमा आएर फेरि विदेशीले नेपालमा असुरक्षा महसुस गर्न थालेका छन् । यसले नेपाल भित्रिने सम्पूर्ण पर्यटकलाई भयभीत बनाएको छ । अर्थ सङकलनको मेरुदण्डका रुपमा रहेको पर्यटन व्यवसायमा आँच आउनु  नेपालको अर्थतन्त्रमा गम्भीर असर पर्नु हो । विदेशीहरु आफ्ना नागरिकप्रति बढी संवेदनशील हुन्छन् । उनीहरुलाई सानो घटनाले पनि भयभीत बनाउछ । जबसम्म नेपाल सरकारले विदेशी पर्यटक सुरक्षित छन् भनेर प्रमाणित गर्न सक्दैन तबसम्म उनीहरु आश्वस्त हुदैनन् । यसले पर्यटक आगमनमा बाधा प¥याउँछ । हाम्रो आर्थिक विकासमा नकारात्मक प्रभाव पार्छ ।

बेलायतले नेपालको राजनीतिक अवस्था अत्यन्त अस्थिर रहेको, बारम्बार बन्द, हड्ताल, विरोध, ¥याली र प्रदर्शन हुने गरेकाले आफ्ना नागरिकलाई सचेत गराउनुपरेको उल्लेख गरेको छ । बेलायतको यो आग्रहले विदेशी पर्यटकमा मनोवैज्ञानिक दबाब सिर्जना गर्छ । र ती पर्यटक नेपालप्रति नकारात्मक धारणा बनाउन बाध्य हुन्छन्, जसले गर्दा नेपाल आएर प्रशस्त खर्च गर्नसक्ने पर्यटकहरु घुम्नका लागि अन्य मुलुक रोज्न बाध्य हुन्छन् । यसले नेपाल भित्रिने पैसा अन्यत्र जाने मात्र होइन, विश्वमा हिमाली सुन्दर मुलुक नेपालको छवि पनि धुमिल हुन्छ ।

२०५३ सालपछि शान्त भूमि नेपालमा अनेक वितण्डा मच्चाइए । लुटपाट, अपहरण, चन्दा असुली, फिरौती, साना हतियारको बिगबिगी, विदेशी पर्यटकमाथि घातक हमला, सुरक्षित ठानिएका स्थानमा दिनदहाडै बम विस्फोटजस्ता अनेक घटनाले पर्यटकलाई त्रस्त बनाउने काम भयो । नेपाल सरकारले कुनै पनि क्षेत्रमा शान्ति सुरक्षाको प्रत्याभूति दिन सकेन । सुशासन कायम गर्न नसक्दाको परिणाम अपराधी, अराजक समूहहरु बढ्दै गए । काठमाडौका अति संवेदनशील स्थानसमेत सुरक्षित रहेनन् । जसको अध्ययन गरिरहेका विदेशी स्वाभाविक रुपले भयभीत बने । यसले गर्दा हाम्रो पर्यटकीय क्षेत्रमा अविश्वास फैलियो र हाम्रो अर्थतन्त्रको एउटा पाटो भत्किने अवस्थामा पुग्यो ।

यस्ता गम्भीर प्रकृतिका विषयमा सरकार सचेत भएर मुलुकमा शान्ति सुरक्षा कायम गर्नुप¥यो । सबैलाई सुरक्षाको प्रत्याभूति दिनुप¥यो । नेपाल घुम्न आउने सम्पूर्ण पर्यटकलाई आफू सुरक्षित छु भन्ने महसुस हुने वातावरण सरकारले निर्माण गर्नुप¥यो । त्यसो गरिएन भने हाम्रो पर्यटन क्षेत्र तहसनहस हुनेछ । यस्तो हुन नदिन सरोकारवाला सबै सचेत बन्नैपर्छ ।

सौर्य दैनिक, सम्पादकीय, १८ फागुन