जहाज खरिद चाडो गर्न प्रधानमन्त्रीको निर्देशन सौर्य समाचार

काठमाडौं, १३ चैत । नेपाल वायुसेवा निगमले खरिद गर्ने भनेको जहाजमा कमिसनको चलखलबारे चर्चा भइरहेका बेला प्रधानमन्त्री डा. बाबुराम भट्टराइले जहाज खरिद प्रक्रियामा भइरहेको अलमल तत्काल हटाउन सरोकारवालाहरुलाइ निर्देशन दिएका छन् । सरोकारवालासँग सोमबार भएको अनौपचारिक वैठकमा प्रधानमन्त्री भट्टराइले सबै अन्यौलता हटाई खरिद प्रक्रियालाई मुर्त रुप दिन आग्रह गरेका हुन् । 

वैठकमा भट्टराइले अन्तराष्ट्रिय उडानका लागी आवश्यक जहाज किन्नको लागि सवै प्रकारका वाधा अड्चन हटाउने तर्फ सरकार लाग्ने बताएका थिए । ‘जहाज खरिदमा देखिएका सबै समस्या समाधान गरेर अगाडी बढ््नुपर्ने उहाँको धरणा छ । जसरी पनि जहाज चाहिन्छ भन्ने उहाँको ‘स्पिरिट’ हो ।’ वैठकमा सहभागी नेपाल वायुसेवाका नायब महाप्रवन्धक तथा प्रवक्ता राजु केसीले भने । वैठकमा जहाज खरिदको विषयमा सर्वोच्च अदालतमा लामो समयदेखि थाति रहेकोे मुद्धा छिटो किनारा लगाईदिन अनुरोध गर्ने बारे पनि छलफल भएको थियो । हरेक कुरामा विवाद सृजना गर्ने तर काम नटुंग्याउने प्रवृति गलत भएको भन्दै प्रधानमन्त्री भट्टराइले यस्तो प्रवृत्ति नदोहो¥याउन आग्रह गरे । 

बैठकमा पर्यटन तथा नागरिक उड्ययन मन्त्री लोकेन्द्र बिष्ट मगर, भौतिक योजना तथा पुननिर्माण मन्त्री हृदयेश त्रिपाठी, एनेकपा माओवादीका सभासद नारायण दाहाल, नेकपा एमालेका सभासद रवीन्द्र अधिकारी, मुख्य सचिव माधव घिमिरे, पर्यटन मन्त्रालयका सचिव गणेशराज जोशी, अर्थ मन्त्रालयका सचिव कृष्णहरी बास्कोटा तथा नेपाल वायुसेवा निगमका कार्यकारी प्रमुख एवं उच्च अधिकारीहरु सहभागी थिए । 

वैठकमा सहभागी पर्यटन मन्त्रालयका सचिव गणेशराज जोशीका अनुसार निगमले खरिद गर्न लागेको चिनियाँ जहाजबारे वैठकमा अनौपचारिक रुपमा मात्र छलफल भएको थियो । अर्का सहभागी सभासद् रविन्द्र अधिकारीले नयाँ प्रक्रिया शुरु गर्नुपर्नेमा प्रधानमन्त्रीले जोड दिएको बताए । 

सरकारले ०६५÷०६६ को बजेट भाषणमा नै निगमका लागी २ वटा ठुला जहाज किन्ने घोषणा गरेपनि विचमै प्रक्रिया अवरुद्ध भएको थियो । निगमले यसका लागी एयरबस कम्पनिलाइ लक अप मनि समेत पठाइसकेको थियो । हालसम्म पनि सो रकम फिर्ता हुन सकेको छैन । एयरबससँगको सम्झौता अवधि सकिएपछि निगमले चिनसँग जहाज खरिदको प्रक्रिया अगाडी बढाएको थियो । तर यसविरुद्ध अख्तियार दुरुपयोग अनुसन्धान आयोग, राष्ट्रिय सतर्कता केन्द्र र सार्वजनिक लेखा समितिमा उजुरी परेपछि प्रक्रिया रोकिएको छ । 

प्रकाशका लागी सहयोग माग्दै पर्यटन व्यवसायी

सगरमाथा चढ्ने तयारीमा रहेको माओवादी अध्यक्ष पुष्पकमल दाहाल पुत्र प्रकाशको टोलीलाइ आर्थिक सहयोग जुटाउन पर्यटन व्यवसायीहरु सक्रिय भएका छन् । व्यवसायीहरुले बैंकमा खाता खोलेर अभियानका लागी सहयोग गर्न आग्रह गरेका हुन् । ‘दिगो शान्ति र संविधानका पक्षधर माओवादी समर्थक पर्यटन व्यवसायीहरु’ को नाममा सोमबार जारी गरिएको विज्ञप्तिमा पर्यटन व्यवसायीलाइ आर्थिक, नैतिक तथा अन्य सबै किसिमको सहयोगका आग्रह गरिएको छ । 

लुम्विनी सगरमाथा शान्ति अभियानका सचिव युवराज दुलालले सरकारको रकम फिर्ता गरेपछि सहयोगको आग्रह गर्दै बैंक खाता खोलिएको बताए । बैंकमा हालसम्म कति रकम जम्मा भएको छ भन्ने बारे चाहिं उनले बताएनन् । चौतर्फि दवावपछि टोलीले सरकारले दिएको २ करोड रुपैयाँ नलिने घोषणा गरेको थियो । सरकारी सहयोग फिर्ता लिन आयोजित पत्रकार सम्मेलनमा दाहालपुत्र प्रकाशले अभियान कुनै हालतमा नरोकिने र रत्नपार्कमा पाल टाँगेर तीन करोड नेपालीबाट एक एक रुपैयाँ सहयोग माग्ने घोषणा गरेका थिए । माओवादी केन्द्रिय सदस्य कृष्ण केसी नेतृत्वको सगरमाथा चढ्ने टोलीमा पार्टी अध्यक्ष पुष्पकमल दाहालका छोरा प्रकाश दाहाल लगायत छन् ।

दिगो शान्ती र स्थायि सविधान विनाको पर्यटन उद्योगको कल्पना समेत गर्न नसकिने भन्दै व्यवसायीहरुले संविधानको मुल नारा लिएर लुम्विनी सगरमाथा शान्ति अभियान नेपाल घोषणा भएको दावी गरेका छन् । ‘अभियानबाट हामी उत्साहित छौ र यसबाट पर्यटन उद्योगको प्रचार प्रसार विश्वभर हुनेछ ।’ विज्ञप्तिमा भनिएको छ । अभियानबाट पर्यटन उद्योगलाइ राष्टिय प्राथमिकता प्राप्त उद्योगको रुपमा स्थापीत गर्न समेत पुग्ने दावी पर्यटन व्यवसायीहरुको छ । 

अभियानका लागी नाम चलेका पर्यटन ब्यबसायीबाट रकम उठाउने काम भइरहेको स्रोतले बताएको छ । ऐच्छिक भनिएपनि माओवादीका उच्च नेतामार्फत् दवाव आइरहेको एक पर्यटन व्यवसायीले बताए । ‘हैसियतभन्दा बढि रकम माग्ने काम भइरहेको छ ।’ उनले भने । स्रोतका अनुसार टे«किङ तथा ट्राभल एजेन्सी सञ्चालकहरुको सूची नै बनाएर चन्दा उठाउने काम भइरहेको छ । अभियानको सहयोगका लागी सांस्कृतिक कार्यक्रम समेत गर्ने तयारी भइरहेको बताइएको छ । जेठ १४ को आसपास सगरमाथा आरोहण गर्ने लक्ष्यका साथ सो टोली आगामी साता त्यसतर्फ प्रस्थान गर्दैछ ।