स्लिम नै सेक्सी

सामान्यतया जिरो साइजले स्लिम र सेक्सी युवतीको प्रतिनिधित्व गर्छ । मोडलिङ र फिल्मी करिअर बनाउनेका लागि सबैभन्दा बढी चासोको विषय हुनेगर्छ जिरो साइज । जिरो साइज बनाउन के के गर्दैनन् युवति डायटिङ, फास्टिङ, एक्सरसाइज आदि आदि । युवति मात्र होइन, युवक पनि मोटो हुन चाहदैनन् । स्लिम बन्ने लहर युवामा पनि छ । 

प्रविधि पनि अहिले युवतीको फिगरभन्दा बाहिर छैन । प्रविधि हाम्रो शरिरभन्दा छरितो बनिसक्यो । शरिरको साइज जस्तै प्रविधि पनि जिरो साइजमा ढल्दैछ । ल्यापटप होस् नोटबुक, ट्याब्लेट होस् वा मोबाइल अथवा पेनड्राइभ नै किन नहोस् । स्लिमको जमाना आएको छ । आफ्नो शरिर मात्र होइन ग्याजेट्समा पनि युवा वर्गको रोजाइ पर्न थालेको छ स्लिम । 

‘स्लिम नै सेक्सी । खल्तिमा राखेको पत्तै हुदैन । चलाउन पनि छुट्टै मज्जा ।’ न्यूरोडको ताम्राकार कम्प्लेक्समा मोबाइल छानिरहेका अरुणिमा कलेजका प्रदिप पौडेलले भने । स्लिम भएपनि सुविधामा कमि छैन । मोबाइल मात्र होइन, मोबाइल आकारको भिडियो क्यामेरा, पकेट प्रोजेक्टर, पातला ल्यापटप, भित्तामै टपक्क टासिने एलसिडि टेलिभजन सबै उपभोग्य प्रविधिहरु स्लिम हुने होडमा छन् । आइफोन उत्पादक एप्पलदेखि सामसुङका स्मार्ट फोनसम्म साइज घटाउने प्रतिस्पर्धामा लागेका छन् ।

युवाको यहि चाहनालाइ ख्याल गर्दै विभिन्न कम्पनिले ग्याजेट्सको साइज स्लिम बनाउन थालेका छन् । आफ्नो ग्याजेट्स स्लिम बनाउने प्रतिस्र्धा नै चलेको छ कम्पनिहरु विच । स्लिम सेटको माग बढेपछि विक्रेताले पनि यस्तै सेट बढि ल्याउन थालेका छन् ।

आइप्याड, ट्याब्लेट तथा म्याकबुक एयरजस्ता अल्ट्राबुकले डिभाइसलाई पातलो बनाउने चलन प्रारम्भ गरे । सन् २०१२ मा पनि यस्ता पातला डिभाइसको निर्माणमा जोड दिने विभिन्न कम्पनिले घोषणा गरिसकेका छन् । डेल कम्पनीले अहिलेसम्मकै स्लिम दावी गर्दै ९.९९ एमएम मोटाईको ल्यापटप उत्पादन गरेको छ । सामसुङले हालै मात्र विश्वकै सबैभन्दा पातलो भएको दाबी सहित नया नोटबुक सार्वजनिक गरेको छ । कम्पनीका अनुसार १५ इन्चको नोटबुक करिब १ किलो तौलको छ । यसको मोटाइ १२ दशमलव ९ मिलिमिटर छ । आधा इन्च पातलो मोबाइल बजारमा आइसकेको छ ।