नया पत्रिका
काठमाडौं, १६ साउन
सन् २०११ को जुलाईमा नेपाल भ्रमण गर्ने विदेशी पर्यटक संख्या गत वर्षको सोही अवधिको तुलनामा २० प्रतिशत बढेको छ । त्रिभुवन अन्तर्राष्ट्रिय विमानस्थल अध्यागमन कार्यालयलाई उद्धृत गर्दै नेपाल पर्यटन बोर्डले जनाएअनुसार गत जुलाई महिनामा हवार्ई मार्ग हुदै ३५ हजार २ सय १२ पर्यटक नेपाल भित्रिएका छन् । गत वर्षको जुलाईमा सो संख्या २९ हजार ३ सय ३८ थियो । जुलाईमा दक्षिण एसिया क्षेत्रबाट आउने पर्यटक २१.७ प्रतिशतले बढेको अध्यागमन कार्यालयको तथ्यांक छ । मुख्य बजार भारतबाट आउने पर्यटक २४.५ प्रतिशतले बढेका छन् । त्यस्तै, पाकिस्तानी ५८ प्रतिशत र श्रीलंकाली पर्यटक ७०.८ प्रतिशतले बढेका छन् । बंगलादेशी पर्यटक भने केही घटेका छन् । दक्षिण एसियाली मुलुकबाट यो महिना १४ हजार ३१ प्र्यटक हवार्ई मार्ग हदै नेपाल भित्रिएका छन् । दक्षिण एसिया बाहेक अन्य एसियाली मुलुकबाट आउने पर्यटक वृद्धिदर जुलाई महिनामा ५६.६ प्रतिशत छ । भारतपछिको अर्को मुख्य बजार चीनबाट आउने पर्यटक सो महिनामा १२७.७ प्रतिशतले बढेका छन् । गत वर्षको जुलाई महिनामा हवाई मार्ग हदै १४ सय ५२ चिनिया पर्यटक नेपाल आएकोमा यो वर्षको जुलाईमा सो संख्या ३३ सय नाघेको छ । अन्य एसियाली मुलुक मलेसिया, सिंगापुर, दक्षिण कोरिया र थाइल्याण्डबाट आउने पर्यटक पनि यो महिनामा बढेका छन् । जापानी पर्यटक भने केही घटेका छन् । एसियाली मुलुकबाट जुलाईमा ७ हजार ५ सय ७० पर्यटक हवाई मार्ग हुदै नेपाल भित्रिएको तथ्यांक छ । युरोपियन बजारतर्फ भने ५.६ प्रतिशतले पर्यटक घटेका छन् । बेलायत, फ्रान्स र बेल्जियमबाट आउने पर्यटक बढे पनि जर्मनी, नेदरल्याण्ड र स्पेनबाट आउने पर्यटक घटेका छन् । गत वर्षको जुलाईमा युरोपियन मुलुकबाट ७ हजार ८ सय ५५ पर्यटक नेपाल आएकोमा यो संख्या यो वर्षको जुलाईमा ७ हजार ४ सयमा झरेको छ । अमेरिका, अष्टे«लिया, र न्युजिल्यान्डका पर्यटक बढेका छन् । क्यानडेली पर्यटक भने केही घटेका छन् । यो वर्षको जुलाईमा २२ सय ६८ अमेरिकी पर्यटक हवार्ई मार्गबाट नेपाल भित्रिएको तथ्यांक छ । समग्रमा सन् २०११ को जनवरीदेखि जुलाईसम्मको पर्यटक आगमन वृद्धिदर २४.३ प्रतिशत रहेको पर्यटन बोर्डले जनाएको छ । यो अवधिमा कुल २ लाख ८० हजार ५ सय ७५ विदेशी पर्यटक हवाई मार्ग हुदै नेपाल भित्रिएका छन् । पर्यटन वर्षमा सरकारले ७ लाख पर्यटक हवाई मार्गबाट नेपाल भिœयाउने लक्ष्य राखेको छ ।
‘पर्यटनप्रतिको जागरण मुख्य उपलब्धि’
मुलुकभर पर्यटनप्रतिको जागरण बढ्नुलाई अधिकारीले पर्यटन वर्षको मुख्य उपलब्धिको रूपमा लिनुपर्ने बताएका छन् । अभियानको ७ महिने समिक्षा गर्दै नेपाल पर्यटन बोर्डका प्रमुख कार्यकारी अधिकृत प्रचण्डमान श्रेष्ठले पर्यटनमा लगानीकर्ता उत्साहित हुनु तथा नेपालको छवि अन्तर्राष्ट्रिय स्तरमा सुधार हुनु अभियानका अन्य उपलब्धि भएको बताए । पर्यटन वर्षको घोषित १० लाख पर्यटक लक्ष्य पूरा हुन नसके पनि ७ लाख ५० हजार पर्यटक आउने निश्चित भएको दाबी उनले गरे । बोर्डको सहयोगमा ३ सयभन्दा बढी पर्यटन व्यवसायीले विश्वका विभिन्न मुलुकमा हुने पर्यटन मेला तथा टे«ड फेयरमा भाग लिएको उनले जानकारी दिए । पर्यटन वर्षको सात महिनाको अवधिमा बोर्ड तथा सचिवालयले २ दर्जन टे«ड फेयर तथा पर्यटन मेलामा भाग लिनुका ५ वटा सेल्स मिसन आयोजना गरेको छ । सो अवसरमा पर्यटन वर्ष प्रचारप्रसार उपसमितिका संयोजक रन्जित आचार्यले सरकारी प्रक्रियाका कारण समयमा प्रचारप्रसार गर्न नसकिएको बताउदै भारत र चिनका लागि पुनः टेन्डर गरिने र बिबिसी तथा सिएनएनबाट सेप्टेम्बरदेखि प्रचारप्रसार सुरु हुने जानकारी दिए । भारतमा युवा वर्ग साहसिक गतिविधिमा बढी रुचि राख्ने भएकोले सो वर्गलाई लक्षित गरेर अभियान सञ्चालन गरिने उनले बताए । पर्यटन वर्ष सचिवालयको सहयोगमा हालै भारतीय टेलिभिजन ‘च्यानल भी’ ले नेपालमा ‘परफेक्ट कपल’ नामक रियालिटी शो को १४ इपिसोड छायांकन गरेको छ । पर्यटन वर्ष मूल समितिका सदस्य रन्जनकृष्ण अर्यालले गत आवको फ्रिज भएको बजेट पनि पर्यटन वर्षका लागि उपलब्ध हुने भएकोले बजेटको कमी नहुने बताए । सरकारले चालू आवमा पर्यटन वर्षका लागि १२ करोड रुपैया छुट्याएको छ । गत आवको खर्च हुन नसकेको १३ करोड रुपैया“समेत सरकारले पर्यटन बोर्डलाई उपलब्ध गराइसकेको छ ।
No comments:
Post a Comment